faculties
གསལ་བསྒྲགས་སྦྱར་པང་།
དེང་རབས་ཚན་རིག་སྡེ་ཚན།
དེ་རབས་ཚན་རིག་སྡེ་ཚན་གྱིས་བསླབ་གཞི་རྣམས་སྤྱི་ཚོགས་ཚན་རིག་གི་སྡེ་ཚན་བརྒྱུད་ལག་བསྟར་བྱེད་ཀྱི་ཡོད། སློབ་གཉེར་ཁང་དབུ་བརྙེས་པ་དང་མཉམ་དུ་གསར་འཛུགས་བྱས་པའི་སྡེ་ཚན་གསུམ་གྱི་ཁོངས་ནས་སྡེ་ཚན་འདི་ཉིད་གཅིག་ཡིན། ད་ལྟའི་ཆར་རིགས་སྡེ་འདི་ནས་ཁ་སྡེའི་ཁོངས་སུ་ཡོད་པའི་སློབ་ཚན། ཨེ་ཤ་ཡའི་བྱུང་རབས། བོད་ཀྱི་བྱུང་རབས། དཔལ་འབྱོར་རིག་པ། སྲིད་དོན་རིག་པ་བཅས་ཀྱི་སློབ་འཁྲིད་བྱེད་བཞིན་ཡོད་ཅིང་། གནས་རིམ་བསྟན་བཅོས་འཛིན་གྲྭ་བར་ཡོད། སློབ་ལོ་༢༠༡༧ དང་ ༢༠༡༨ ནས་བཟུང་། བོད་ཀྱི་བྱུང་རབས་ཐོག་སློབ་དཔོན་དང་། རིག་པའི་ཆུ་གཏེར་གྱི་གནས་རིམ་གྱི་བསླབ་གཞི་ངོ་སྤྲོད་བྱས་ཡོད། བོད་ཀྱི་བྱུང་རབས་ཀྱི་སློབ་དཔོན་གནས་རིམ་ནང་བོད་ཀྱི་རིག་གཞུང་དང་ཆབ་སྲིད་བཅས་བྱུང་རབས་ཁག་དང་། དེ་བཞིན་གནའ་ཤུལ་རིག་པ་དང་། མི་རིགས་རིག་པ། ལོ་རྒྱུས་རིག་པ། དངུལ་དཔྱད་རིག་པ་བཅས་ཀྱི་ངོ་སྤྲོད་བཅས་ཚུད་ཡོད།
དེང་རབས་ཚན་རིག་གི་རིག་སྡེའི་ཁོངས་སུ་སྡེ་ཚན་གཅིག་ཡོད།
- སྤྱི་ཚོགས་ཚན་རིག་གི་སྡེ་ཚན།
རིགས་སྡེ་འདི་ནས་སློབ་འཁྲིད་བྱེད་པའི་བསླབ་གཞིའི་ཡོན་ཚན།
- སློབ་དཔོན་འཛིན་གྲྭ།
- རིག་པའི་ཆུ་གཏེར།
བསླབ་གཞིའི་གྲུབ་འབྲས།
- བོད་ཀྱི་ལོ་རྒྱུས་ཐོག་སློབ་དཔོན་དང་རིག་པའི་ཆུ་གཏེར་གྱི་ཡོན་ཚད།
བསླབ་གཞི་འདི་ནི་སློབ་གཉེར་བ་རྣམས་བྱུང་རབས་རིག་པ་སྤྱི་དང་། བྱེ་བྲག་ཏུ་བོད་ཀྱི་ལོ་རྒྱུས་སྲོལ་རྒྱུན་དང་། རྣམ་གཞག ཐབས་ལམ། ལྟ་བ་བཅས་ཀྱི་ཐོག་སྦྱོར་བརྡར་སྤྲད་རྒྱུར་བཟོས་པ་ཡིན། དེས་མ་ཚད་བསླབ་གཞི་འདི་ནི་གནའ་དེང་གི་རྒྱལ་སྤྱིའི་འབྲེལ་ལམ། རྩོམ་རིག རིག་གཞུང་། འཛིན་སྐྱོང་བཅས་ཀྱི་འཕེལ་རིམ་གྱི་ཐོག་ལོ་རྒྱུས་རང་བཞིན་གྱི་ཤེས་བྱས་ཕྱུག་པ་ཞིག་ཡིན། བོད་ཀྱི་ཆབ་སྲིད་དང་རིག་གཞུང་གི་ལོ་རྒྱུས་རིག་པ་ནི་སློབ་ཚན་གྱི་གཙོ་གནས་དེ་ཡིན་ཞིང་། སྤྱི་ཚོགས་དང་། དཔལ་འབྱོར། གནས་བཤུལ་རིག་པ། མི་རིགས་རིག་པ་བཅས་ཀྱི་ཁ་ཕྱོགས་ལྟ་སྟངས་ཀྱང་ཚུད་ཡོད། བོད་ཀྱི་རྒྱ་ཆེ་གཏིང་ཟབ་ཀྱི་ཤེས་བྱ་དང་། ལོ་རྒྱུས་རིག་པས་ཡོངས་སུ་ཕྱུག་པ་ལས། སློབ་གཉེར་བ་རྣམས་ཀྱིས་གནའ་ཤུལ་རིག་པ་དང་རིག་གཞུང་གི་རྒྱུས་སྟོན་ཆེད་ལས་དང་། འཆད་འཁྲིད། ཉམས་ཞིབ་སོགས་ཀྱི་ནང་གོ་སྐབས་བླང་ཐུབ་པ་བྱུང་གི་ཡོད།
