མཐུན་རྐྱེན།
གསལ་བསྒྲགས་སྦྱར་པང་།
མཐུན་རྐྱེན།
སྔོ་ལྗང་ཁོར་ཡུག་གིས་མཛེས་པའི་ཝཱ་ཎ་མཐོ་སློབ་ཀྱི་རྒྱ་ཁྱོན་ནི་ཨེ་ཀར་ཉི་ཤུ་རྩ་དགུ་ཙམ་ཡོད་ཅིང་། ཕྱིའི་འཛུགས་སྐྲུན་གྱི་ཆ་ནས་བོད་ལུགས་བཟོ་བཀོད་ཅན་གྱི་ཁང་བཟང་དང་། དེ་འབྲེལ་མཐུན་རྐྱེན་དུ་མའི་སྒོ་ནས་འཕེལ་རྒྱས་ཕྱིན་ཡོད། འཛིན་སྐྱོང་ནས་སློབ་གླིང་གི་འཛུགས་སྐྲུན་ཐམས་ཅད་ཁོར་ཡུག་ལ་གནོད་འགལ་མེད་པར་དོ་ནན་བྱས་ཡོད།
སློབ་གཉེར་ཁང་གི་ཕྱི་སྣོད་ཀྱི་བཀོད་པའི་ནང་དུ་འཛིན་སྐྱོང་གི་ཡིག་ཚང་ཁག་དང་། འཛིན་ཁང་དང་དགེ་རྒན་གྱི་ཡིག་ཚང་ཚུད་པའི་ཤེས་རིག་སྡེ་ཁོངས་ཀྱི་ཁང་ཆེན་བཞི་ཡོད། དེ་བཞིན་དཔེ་མཛོད་ཁང་དང་། མགྲོན་ཁང་གཉིས། ཚོགས་ཁང་ཆེན་པོ་གཅིག ཚོགས་ཁང་ཆུང་བ་ལྔ། བགྲོ་གླེང་ཁང་བདུན་བཅས་ཡོད། ཨ་ཏི་ཤའི་ཚོགས་ཁང་དུ་ནང་ཆོས་དང་། དེ་འབྲེལ་བརྗོད་གཞི་ཁག་གི་ཐོག་ལ་བགྲོ་གླེང་དང་ཚོགས་འདུ་སོགས་འཚོག་གི་ཡོད། དེ་བཞིན་སློབ་གླིང་འདིར་སློབ་གཉེར་བ་གཞོན་པ་རྣམས་དང་རྒན་པ་རྣམས་ཉལ་ཁང་རེ་རེ་སྟེ་གཉིས་དང་། སློབ་གཉེར་བ་བུ་མོ་རྣམས་ལ་ཡང་དེ་མཚུངས་ཉལ་ཁང་གཉིས་ཡོད།
དེ་བཞིན་ཉམས་ཞིབ་སློབ་གཉེར་བ་རྣམས་དང་། སློབ་དཔོན་གྱི་སློབ་གཉེར་བའི་ཆེད་དུ་ཉལ་ཁང་ལོགས་སུ་ཡོད་ཅིང་། བསྟན་བཅོས་སློབ་གཉེར་བའི་ཆེད་དུ་ཉལ་ཁང་གསར་རྒྱག་བྱེད་བཞིན་ཡོད། སློབ་གླིང་གི་ཁོ་ར་ཁོར་ཡུག་ཐམས་ཅད་ཡར་ཐོན་ཅན་གྱི་ཆ་འཕྲིན་འཕྲུལ་ཆས་ལས་གྲུབ་པའི་སྐུད་མེད་དྲ་རྒྱའི་མཐུན་རྐྱེན་ཡོད་ཅིང་། སློབ་གཉེར་ཁང་གི་སྐུ་མགྲོན་གྱི་ཆེད་ཆ་རྐྱེན་ཕུན་སུམ་ཚོགས་པའི་མགྲོན་ཁང་གཉིས་ཡོད། སློབ་གཉེར་བ་དང་། ཐ་ན་ལས་བྱེད་རྣམས་ཀྱི་དགོས་མཁོའི་ཆེད་དུ་སྤྱི་ཐབ་ཡོད་ཅིང་། སློབ་ཁང་གི་རྒྱལ་སྒོའི་ཉེ་འཁྲིས་སུ་ཟས་རིགས་སྣ་མང་ཅན་གྱི་ཟ་ཁང་ཡོད། དེ་བཞིན་སློབ་ཁང་འདིའི་ཁང་ཆེན་ཕལ་ཆེར་གྱི་ནང་དུ་ཐོན་གསར་སྤུས་ལེགས་ཅན་གྱི་ཆ་རྐྱེན་རང་སྒྲིག་གི་ཚོགས་ཁང་ཡོད།
